የእረኝነት አገልግሎት መምሪያችን የአጥቢያዎቻችንንና የመጋቢዎቻችንን ሕይወትና አገልግሎት በመከታተል፤ በማሰልጠንና እንዲሁም ምደባና ክትትል በማድረግ ከፍተኛ ሥራ እየሠራ ይገኛል። በሥሩም የጋብቻና ቤተሰብ ክፍልና የልጆችና የወጣቶች አገልግሎት ዘርፍ በመክፈት አጥቢያዎቻችን በብዙ አየደገፈና እየጠቀመ ይገኛል፡፡ በመላው አገሪቱም በቤተ እምነቷ እውቅና ያገኙ 350 መጋቢዎች ሲኖሩ፤ 2720 የሚሆኑ የሙሉ ጊዜ አገልጋዮች ደግሞ በቤተ እምነቷ ይገኛሉ፡፡

የኢትዮጵያ አማኑኤል ኀብረት ቤተክርስቲያን የምትከተለው የመጋቢያን አመራር እንደመሆኑ አጥቢያዎች በጠንካራ መጋቢያን እንዲመሩ ከፍተኛ ጥረት ታደርጋለች፡፡ በባለፉት 10 ዓመታት ብቻ እንኳ ከ100 የሚበልጡ መጋቢዎችን በተለያዩ ከተሞች መሾም የቻለች ሲሆን በተመሳሳይ ሁሉም አጥቢያዎች የራሳቸው መጋቢ እብዲኖራቸው እየሠራች ትገኛለች፡፡ ቤተክርስቲያኒቱ የመጋቢዎችን አጠቃላይ የአመራር ብቃት የምታጎለብትበት የተለያዩ አጫጭር ስልጠናዎችን በማዘጋጀት ብቁ መጋቢያዊ አገልግሎት እንዲሰጥ ታግዛለች፡፡

በተጨማሪም በዋናው ጽ/ቤት ደረጃ የእረኝነት መምሪያን የሚያስተባብር አካል ከማስቀመጥ ባለፈ በቅርብ እርቀት የአጥቢያዎችን አጠቃላይ ደኅንነት የሚከታተሉ የክልል እና የዞን ቢሮዎችን አቋቁማለች፡፡ ምንም እንኳ ከአቅም ማነስ ጋር ተያይዞ በሁሉም አካባቢዎች የዞን ቢሮዎችን መክፈት ባትችልም አሁን ባሉት የዞን እና የክልል ቢሮዎች በተቻለ መጠን ሁሉም አጥቢያዎች በሚፈለገው መጠን አስፈላውን አገልግሎት እንዲያገኙ እየሠራች ትገኛለች፡፡ ከዚህ ጋር ለቤተሰብ አገልግሎት ትኩረት በመሰጠት እና በክፍል ደረጃ ቢሮን በማቋቋም እና ለቦታው ሸክም ያለውን ሰው በመመደብ አረአያነት ያለው ሥራ እየሠራች ትገኛለች፡፡